“SOINUBANDA: GORKA URBIZU JOSEINA ETXEBERRIAREKIN”

Lagun batek kantu, disko edo talde/bakarlari bat gomendatzen dizunean bezala. Izan ere, ba al dago gauza handiagorik?

SOINUBANDA proposatzen dizugu. Gure musikari eta kultura-munduko izen azpimarratuen SOINUBANDAk. Beren musikan edo kultura-ekarrian, eragina izan duten kantu, eta album eta kontzertuak. Eta horretarako binilo zahar bezala berriak berreskuratuko ditugu edo plataforma digitaletako klikak zenbatu. Eta norbaitek Youtube-ko bideo bat erakutsi nahi badigu, hura ikusi eta hartaz aritu ere bai.

Lehen MUSIKERO honetara Gorka Urbizu gonbidatu dugu, Berri Txarrak taldeko sortzaile eta kide ohia, eta bakarkako ibilbidea erabateko arrakastarekin hasi berri duena. Gure nahia da egilearen erretratua egitea, zer egin duen eta zergatik, zerk bultzatu duen horretara. Solasaldi goxoa izango da Gorka Urbizurekin, gaur egun den artista izatera eraman duten hamar kantu aitzaki hartuta.

Musika entzungo dugu, eta musikaz hitz-egin. Orduterdiko proposamena luzatzen dizugu. Bi butaka, argi epela, soinu beroa eta bihotzak mugituko dituen abesti eta kontuak. Egunean eguneko, eta lekuan-lekuko, protagonista eta honekin elkarrizketan Joseina Etxeberria eta bere musika zaletasun guztia.

Zer musika ote dago herri honen kultura-ekarriaren atzean?

ENTZUN DEZAGUN!!!